Department of Marathi

पार्वतीबाई चौगुले महाविद्यालयातील मराठी विभाग, मराठी विषयातील पदवीधर विद्यार्थी घडवताना विद्यार्थ्यांमध्ये सर्वप्रथम साहित्य: वाचन, लेखन व संशोधनविषयक जाणीव निर्माण करून भाषिक कौशल्ये विकसित करण्याचे धोरण अंगिकारतो.
वरील कौशल्ये आत्मसात करून सामाजिक व शैक्षणिक क्षेत्रात विद्यार्थ्यांने नावलौकिक संपादन करावा हा हेतू समोर ठेऊनच अभ्यासक्रमाचे नियोजन केलेले आहे. काव्यशात्र, साहित्याचे प्रकार व उपयोजन, व्याकरण व भाषाशात्र यासारख्या अनिवार्य विषयांबरोबरच गोमंतकीय मराठी साहित्य: समीक्षा आणि संशोधन, गोमंतक आणि कोकण या प्रदेशातील लोककला, आधुनिक मराठी साहित्यप्रकार (ललित निबंध, प्रवासवर्णन, आत्मचरित्र, प्रादेशिक कादंबरी), साहित्याभिरूचीचे स्वरूप, कार्यक्रम संयोजन आणि संचालन कौशल्य, भाषांतर विद्या, पटकथालेखन यासारख्या विषयांचा अभ्यासक्रमामध्ये अंतर्भाव वरील उद्दीष्टांच्या पूर्तीसाठी करण्यात आलेला आहे.

विभागामध्ये मराठी भाषा व साहित्य, गोमंतकीय मराठी साहित्य, लेखनकौशल्ये, प्रसारमाध्यमांसाठी लेखन या क्षेत्रातील अनुभवी शिक्षकवर्ग कार्यरत आहेत. सामंजस्य करारांतर्गत शैक्षणिक व सांस्कृतिक आदानप्रदान केले जाते. गोवा मराठी अकादमी, रवींद्र भवन, मडगाव यासारख्या संस्थांचा सहयोग लाभतो. अध्यापनामध्ये स्वाध्याय, गटचर्चा, स्वयंअध्ययन, दृक् श्राव्य सादरीकरण इ. आधुनिक कौशल्यांचा समावेश केला जातो.
नियोजित व्याख्यांनासोबतच ‘सप्तरंग’, ‘नवांकुर’ यासारख्या साहित्य आणि कला यांचे जोपासन करणाऱ्या कलामहोत्सवातून तसेच लेखकांशी संवाद, मान्यवरांची व्याख्याने, वाचक गटांतर्गत केले जाणारे विविध उपक्रम या सर्वातून विद्यार्थांमध्ये संयोजन, वाचन, लेखन, वक्तृत्त्व, सादरीकरण यासारख्या कौशल्यांच्या विकासामध्ये मदद केली जाते. कथा, कविता व ललित निबंध लेखन या विषयी मार्गदर्शन केले जाते त्यामुळे साहित्यविषयक जाणिवांच्या विकासामध्ये भर पडते.
गोमंतकीय मराठी साहित्यावरील राष्ट्रीय आणि राज्यस्तरीय चर्चासत्रांचे आयोजन करून विद्यार्थ्यांच्या मनामध्ये गोमंतकीय मराठी साहित्याच्या वाचनाची व त्यावरील संशोधनाची आवड निर्माण केली जाते. प्रकल्प कार्य, शोधनिबंध, आणि ग्रंथ संपादन याविषयीची माहिती दिली जाते व प्रास्ताविक स्वरूपात त्यांच्या कार्यक्षमतेचे मूल्यांकन करण्यात येते.
विद्यार्थ्यांचा भाषा आणि साहित्य या विषयाचा सर्वांगीण अभ्यास होईल त्यामुळे साहित्याबाबतीत असलेली मुख्य कौशल्ये ते आत्मसात करतील. साहित्याचे परीक्षण, वाङ्मयीन सिद्धांत आणि संशोधन या बाबतीतला दृष्टीकोन विकसित होईल.
पूरक अभ्यासक्रमाच्या माध्यमातून विविध प्रसार माध्यमे, मुद्रित शोधन, जाहिरात लेखन, मुलाखत लेखन, निमंत्रणपत्रिका, स्मरणिका व गौरविका इ. माध्यमातून विद्यार्थ्यांना रोजगार संधी उपलब्ध होतील.
मराठी भाषेचे ज्ञान असलेला कोणत्याही शाखेतील बारावी उत्तीर्ण विद्यार्थी प्रवेशास पात्र आहे. मराठी भाषा, साहित्य व संशोधन क्षेत्रामध्ये कार्य करण्याची इच्छा असलेल्या विद्यार्थ्यांना हा अभ्यासक्रम उपयुक्त ठरणार आहे. पदवी संपादन करणाऱ्या विद्यार्थ्यांसोबतच भाषा, साहित्य, कला पूरक अभ्यासक्रमाची आवश्यक असणाऱ्या इतर नागरिकांसाठी हा अभ्यासक्रम उपयुक्त ठरेल.